ОЛОН УЛСЫН ЗУНЫ СУРГАЛТАД АМЖИЛТТАЙ ОРОЛЦЛОО.

МУИС-ийн Инженер, Технологийн Сургууль болон Өвөр Монголын Шинжлэх Ухаан, Технологийн Их Сургууль (Inner Mongolia University of Science & Technology)-ийн хамтын ажиллагааны хүрээнд 2025 оны 6 сарын 29-өөс 7 сарын 10-ны хооронд зохион байгуулсан Олон улсын зуны сургалтад амжилттай оролцлоо.
Энэхүү зуны сургалтад ИТС-ийн Хүрээлэн буй орчин судлал, Био-инженерчлэл, Химийн инженерчлэл, Сэргээгдэх эрчим хүч, Ойн аж ахуй, Хүрээлэн буй орчны инженерчлэл, мөн Баруун бүсийн сургуулийн Цахилгааны инженер хөтөлбөрийн оюутнууд амжилттай оролцож, олон улсын түвшинд мэдлэг, туршлагаа тэллээ.

Зуны сургалтын нээлтэд ИТС-ийн захирал, профессор Ч.Сономдагва үг хэлж, профессор Д.Батсүрэн, дэд профессор Р.Чинзориг нар зуны сургалтын хүрээнд өөрсдийн мэргэжлийн чиглэлээр хичээл орлоо.

Сургалтад Монгол, БНХАУ, ОХУ, Беларусь, Их Британи зэрэг орны их, дээд сургуулийн оюутан, судлаачид хамтран оролцсон нь олон улсын харилцаа, туршлага солилцоог өргөжүүлэх сайхан боломж боллоо.

Сургалтын хүрээнд:
Оролцогчид танхимын лекц, семинаруудад оролцохоос гадна дэлхийд сүү, сүүн бүтээгдэхүүний үйлдвэрлэлээр №5-д жагсдаг Yili үйлдвэр, экологийн нөхөн сэргээлт, цөлжилттэй тэмцэх чиглэлээр тэргүүлэгч M-Grass seedling factory, Төв цэвэрлэх байгууламж, Нанхайн ус намгархаг газрын хүрээлэн, Улаансухай нуур, Kubuqi Desert-ийн ойжуулалт, Baogang ган төмөрлөгийн групп зэрэг байгууллагуудын үйл ажиллагаатай танилцаж, практик дадлага хийсэн нь зуны сургалтын нэгэн чухал хэсэг байлаа.

Түүнчлэн зуны сургалтын үеэр “Монгол-Хятадын хамтарсан Хүрээлэн буй орчны хамгаалал, нөхөн сэргээлтийн лаборатори”-ийн нээлт болсон нь онцлох үйл явдлын нэг байв. Энэхүү лаборатори нь 2024 онд байгуулсан хамтын ажиллагааны гэрээний хүрээнд хэрэгжиж байгаа томоохон алхам бөгөөд цаашид хоёр сургуулийн хүрээлэн буй орчны чиглэлийн судалгаа, инновацын хамтын ажиллагааг шинэ түвшинд гаргах зорилготой юм.

Хамтын ажиллагаа, мэдлэг туршлагаа хуваалцсан энэхүү зуны сургалт нь оюутнуудын хувьд мэргэжлийн өсөлт, олон улсын харилцааны гүүр болсон үнэ цэнтэй аялал байлаа.