10/29, 2026
МУИС-ийн Инженер, Технологийн сургуулийн профессор багш, эрдэмтдийг төрийн дээд одон, медалиар шагнасан баярт үйл явдал тохиолоо.
2026/05/07 04:55
zaya zaya
Инженер, технологийн сургуулийн Хими, биологийн инженерчлэлийн тэнхимийн профессор, МУИС-ийн Нано шинжлэх ухаан, нанотехнологийн төв (NUM NanoCenter)-ийн захирал, доктор Чимэдийн Ганзориг болон Ногоон эрчим хүч, инженерчлэлийн тэнхимийн профессор Мягмаржавын Одсүрэн нарыг боловсрол, шинжлэх ухаан, судалгаа, инновацын салбарт олон жилийн турш тасралтгүй, үр бүтээлтэй ажиллаж, Монгол Улсын дээд боловсрол, шинжлэх ухааны хөгжил, эрдэм шинжилгээ, судалгааны ажлыг хөгжүүлэх, залуу судлаачдыг бэлтгэн төлөвшүүлэх, шинжлэх ухааны ололт амжилтыг практикт нэвтрүүлэх үйлсэд оруулсан үнэтэй хувь нэмрийг нь өндрөөр үнэлэн Монгол Улсын Ерөнхийлөгчийн зарлигаар төрийн дээд шагналуудаар шагналаа.
Тодруулбал, профессор Чимэдийн Ганзоригийг “Хөдөлмөрийн гавьяаны улаан тугийн одон”-оор, профессор Мягмаржавын Одсүрэнг “Хөдөлмөрийн хүндэт медаль”-аар тус тус шагнасан нь МУИС-ийн Инженер, технологийн сургуулийн хамт олны төдийгүй Монголын боловсрол, шинжлэх ухааны салбарын бахархалт үйл явдал болж байна.
Эрхэм хүндэт профессор багш, судлаач эрдэмтдийн олон жилийн хөдөлмөр, эрдэм мэдлэг, бүтээлч санаачилга нь МУИС-ийн хөгжил дэвшил төдийгүй Монгол Улсын боловсрол, шинжлэх ухаан, инновацын салбарын хөгжилд үнэтэй хувь нэмэр болсоор ирсэн билээ.
Цаашдын эрдэм судлал, сургалт, судалгаа шинжилгээний ажил үйлсэд нь улам өндөр амжилт, аз жаргал, сайн сайхан бүхнийг хүсэн ерөөе.
