Профессор Норико Хасэбэ-д Хүндэт доктор цол олгов.

ЯПОН УЛСЫН КАНАЗАВАГИЙН ИХ СУРГУУЛИЙН ПРОФЕССОР НОРИКО ХАСЭБЭ (NORIKO HASEBE)-Д МОНГОЛ УЛСЫН ИХ СУРГУУЛИЙН ИНЖЕНЕР, ТЕХНОЛОГИЙН СУРГУУЛИЙН “ХҮНДЭТ ДОКТОР” ЦОЛ ОЛГОЛОО.

Япон Улсын Каназава их сургуулийн профессор, Гадаад хамтын ажиллагаа хариуцсан дэд ерөнхийлөгч Норико Хасэбэ (Noriko Hasebe) нь МУИС-тай 2012 оноос хойш тасралтгүй 14 жилийн хугацаанд хамтран ажиллаж, Монгол Улсын болон МУИС-ийн эрдэм шинжилгээ, сургалтын үйл ажиллагаанд оруулсан хувь нэмрийг өндрөөр үнэлж, 2026 оны 03 сарын 31 өдрийн Хүрээлэн буй орчин, ойн инженерчлэлийн тэнхимийн хамт олны хурлаар “Хүндэт доктор” цол олгохыг дэмжиж, Инженер, технологийн сургуулийн Эрдмийн зөвлөлийн 2026 оны 05 сарын 07 өдрийн хурлаар хэлэлцэж, 2026 оны 05 сарын 12 өдрийн 03 тоот тогтоолоор МУИС-ийн ИТС-ийн “Хүндэт доктор” цол олгохоор шийдвэрлэсэн. 

Уг шийдвэрийн дагуу 2026 оны 06 сарын 10 өдөр Норико Хасэбэ профессорт “Хүндэт доктор” цолыг гардуулах хүндэтгэлийн үйл ажиллагаа МУИС-ийн Эрдмийн танхимд зохион байгуулагдлаа. Тус хүндэтгэлийн арга хэмжээнд “Хүндэт доктор” цол хүртэгч профессор Норико Хасэбэ биечлэн хүрэлцэн ирэхийн зэрэгцээ Япон Улсын ЭСЯ-ны Хэргийг түр хамаарагч Кондо Казүмаса, Соёл, мэдээллийн хэлтсийн дарга Сайто Миёоко, Соёл мэдээллийн хэлтсийн ажилтан Б.Гэрэл, ИТС-ийн Эрдмийн зөвлөлийн гишүүд, Инженер, технологийн дээд боловсрол төслийн төлөөлөл, Каназава их сургууль төгсөгчдийн холбооны төлөөлөл, Норико Хасэбэ профессорын Монгол, Япон шавь нар болон бусад албаны хүмүүс хүрэлцэн ирэв. 

  “Хүндэт доктор” цол хүртэгч профессор Норико Хасэбэ нь:

• 2012 оноос хойш МУИС-ийн хүрээлэн буй орчин, газарзүй, нуур судлал, хурдас судлалын чиглэлд тасралтгүй 14 жил хамтран ажилласан. 

• Нуурын ус-хурдас чиглэлд өөрийн шавь сургалтыг бэлтгэж, 1 пост-доктор (У.Уянгаа), 2 доктор (Г.Шуухааз, У.Уянгаа), 4 магистр (Б.Ганцоож, З.Баасанжав, Г.Шуухааз, У.Уянгаа) нарыг бие даан болон хамтран удирдаж, амжилттай хамгаалуулсан.

• Тэрээр 2012 оноос өнөөг хүртэл МУИС-ийн багш, судлаач нартай хамтран 4 том төслийг хэрэгжүүлсэн. 

• Эрдэм шинжилгээний хамтын бүтээл 10 (өгүүлэл 9, ном 1) хэвлүүлсэн.

• 11 удаагийн судалгааны санхүүгийн тэтгэлэг (ойролцоогоор 110 сая төгрөг) олгосон.

• 49 оюутныг урт-богино хугацаагаар Каназава их сургуульд сургалт-судалгааны хөтөлбөрт хамруулан (ойролцоогоор 175 сая төгрөг) МУИС-ийн оюутан солилцооны хөтөлбөрт үнэлүүштэй хувь нэмэр оруулсан. 

• Түүнээс гадна судалгааны талбайгаа Монгол орны баруун бүс нутагт төвлөрүүлж, хээрийн болон суурин судалгааны тоног төхөөрөмжөөр (ойролцоогоор 55 сая төгрөг) хангасан. 

• Түүний удирдсан 3 Монгол оюутан Каназава их сургуулийн шилдэг оюутнаар шалгарч байсан.