07/30, 2026
Доктор Б.Цэнгэлд “Хүндэт доктор” цол хүртээлээ
2025/09/23 11:04
Badamkhand Legjidmaa
Монгол Улсын Их Сургуулийн Инженер, Технологийн сургуулийн Эрдмийн зөвлөлийн 2025 оны 9 дүгээр сарын 3-ны өдрийн №5-4 тоот тогтоолын дагуу Хүрээлэн буй орчин, ойн инженерчлэлийн тэнхимийн ахмад багш, дэд профессор, доктор Батхишигийн Цэнгэлд “Хүндэт доктор” цол хүртээх ёслолын арга хэмжээ 2025 оны 9 дүгээр сарын 22-ны өдөр (Даваа гаригт) Монгол Улсын Их Сургуулийн Төв байрны Дугуй танхимд зохион байгуулагдлаа.
Доктор Б.Цэнгэл нь Монгол орны ой судлал, ногоон байгууламжийн чиглэлээр 35 жилийн турш тасралтгүй багшилж, эрдэм шинжилгээ, сургалт, олон нийтийн боловсролын салбарт үнэтэй хувь нэмэр оруулж ирсэн билээ. Тэрээр:
- Доройтсон ойг нөхөн сэргээх технологийн боловсруулалт, ойн үрийн чанарыг дээшлүүлэх, хот суурин газрын ногоон байгууламжийг оновчтой төлөвлөх чиглэлээр дотоодын болон олон улсын төсөл, хөтөлбөрийг удирдан хэрэгжүүлсэн;
- 78 эрдэм шинжилгээний өгүүлэл, 45 илтгэл хэвлүүлж, 16 магистр, 1 докторын судалгааны ажлыг удирдан амжилттай хамгаалуулсан;
- “Мөрөөдөлийн цэцэрлэгт хүрээлэн” зэрэг баримтат кино, сургалтын гарын авлага бүтээн, салбарын мэдлэгийг олон нийтэд түгээн дэлгэрүүлсэн;
- Боловсрол, шинжлэх ухаан, байгаль орчны салбарт оруулсан онцгой гавьяаг нь үнэлж, Байгаль орчны (2005), Нийслэлийн (2007), Боловсролын (2011), Шинжлэх ухааны (2016) тэргүүний ажилтан цол тэмдэг болон “Алтан гадас” одонгоор шагнагдсан юм.
Эрдмийн их үйл хэрэгтээ тууштай зүтгэж, шинжлэх ухаан, боловсрол, байгаль орчны салбарт үнэлэгдэхүйц хувь нэмэр оруулсан эрхэм багшид “Хүндэт доктор” цол хүртээсэн нь МУИС, ИТС-ийн хамт олны бахархал төдийгүй, хойч үеийн судлаач, инженерүүдэд үлгэр дууриал болох үйл явдал юм.
Хүрээлэн буй орчин, ойн инженерчлэлийн тэнхим
2025.09.22
Гэрэл зургийг Г.Билгүүн
