ХУАВЕЙ ТЕХНОЛОЖИ ХХК СУРГАЛТ, СУДАЛГААНЫ ОРЧНЫГ САЙЖРУУЛАХАД ДЭМЖЛЭГ ҮЗҮҮЛЛЭЭ

Хуавей Техноложи ХХК нь МУИС-ийн Инженер, технологийн сургууль (ИТС)-тай 2025 оны 5 дугаар сард хамтын ажиллагааны санамж бичиг байгуулж, сургалт, судалгаа, технологи, инновацын чиглэлээр хамтран ажиллаж байна.

Энэхүү хамтын ажиллагааны хүрээнд Хуавей Техноложи ХХК нь МУИС-ийн ИТС-ийн Ногоон эрчим хүч, инженерчлэлийн тэнхим (НЭХИТ)-ийн сургалт, судалгааны орчныг сайжруулахад дэмжлэг үзүүллээ.
Тодруулбал, Сэргээгдэх эрчим хүч, цахилгаан эрчим хүч, чадлын электроникийн чиглэлийн мэргэжлийн голлох хичээлүүдийн сургалт, туршилтын ажил явагддаг Чадлын электроникийн лаборатори, мөн Сэргээгдэх эрчим хүч хөтөлбөрийн багш нарын өрөөг шинэчилэн тохижуулав.

Чадлын электроникийн лаборатори нь оюутнуудын онолын мэдлэгийг практик туршилт, хэмжилт, судалгааны ажилтай хослуулах, сэргээгдэх эрчим хүч, чадлын хувиргуур, эрчим хүч хуримтлуур, цахилгаан эрчим хүчний систем болон орчин үеийн чадлын электроникийн технологийн чиглэлээр мэдлэг, ур чадвараа хөгжүүлэхэд чухал ач холбогдолтой сургалт, судалгааны орчин юм.
Тус дэмжлэгийн үр дүнд оюутнуудын суралцах, лабораторийн дадлага, туршилт, судалгааны ажил хийх нөхцөл сайжрахаас гадна багш, судлаачдын ажиллах орчны тав тух, бүтээмжийг нэмэгдүүлэхэд бодит хувь нэмэр оруулж байна.
Их, дээд сургууль болон технологийн салбарын тэргүүлэгч байгууллагын хамтын ажиллагааг бодит үр дүнгээр баяжуулж, МУИС-ийн сургалт, судалгааны орчныг сайжруулахад үнэтэй хувь нэмэр оруулж буй Хуавей Техноложи ХХК-ийн хамт олонд тэнхимийн нийт багш, судлаач, оюутнуудынхаа өмнөөс талархал илэрхийлье.
Цаашид талуудын хамтын ажиллагааг улам өргөжүүлж, сэргээгдэх эрчим хүч, эрчим хүч хуримтлуур, чадлын электроник, шинэ технологийн чиглэлээр сургалт, судалгаа, инновацын ажлыг хамтран хөгжүүлэхийг зорьж байна.