НЭХИТ-ийн профессор М.Одсүрэн ОХУ-ын Дубна хот дахь Олон улсын цөмийн шинжилгээний нэгдсэн институтэд ажиллаа

НЭХИТ-ийн профессор М.Одсүрэн ОХУ-ын Дубна хот дахь Олон улсын цөмийн шинжилгээний нэгдсэн институтын Нобелийн шагналт И.М. Франкийн нэрэмжит Нейтроны физикийн лабораторид томилолтоор ажиллаж, олон улсын хамтарсан цөмийн урвалын туршилт, эрдэм шинжилгээний хуралд оролцов.

Томилолтын хүрээнд Монгол, Орос, Хятад, Казахстан улсын эрдэмтдийн хамтарсан судалгааны баг ³⁵Cl дээж дээр нейтроноор өдөөгдсөн цөмийн урвалыг судалж, урвалаас үүсэх альфа бөөмийг бүртгэх, урвалын огтлол болон бүтээгдэхүүн бөөмийн өнцгийн түгэлтийг хэмжих туршилтын ажилд оролцлоо. Уг туршилтыг Олон улсын цөмийн шинжилгээний нэгдсэн институтын Нейтроны физикийн лабораторийн судлаач, доктор Э.Сансарбаяр удирдан явуулав.

     Мөн профессор М.Одсүрэн тус институтэд зохион байгуулагдсан “32nd International Seminar on Interaction of Neutrons with Nuclei: Fundamental Interactions & Neutrons, Nuclear Structure, Ultracold Neutrons, Related Topics” (ISINN-32) олон улсын эрдэм шинжилгээний хуралд докторант Б.Өсөхбаярын хамт оролцов. Тус хурал нь нейтрон ба цөмийн харилцан үйлчлэл, цөмийн бүтэц, хэт хүйтэн нейтрон, хүчтэй-сул харилцан үйлчлэлийн чиглэлээр олон улсын эрдэмтэн судлаачдын шинэ үр дүн, хамтын ажиллагааг хэлэлцдэг чухал арга хэмжээ юм.

      Уг томилолт нь ИТС-ийн цөмийн физик, цөмийн урвалын судалгааны олон улсын хамтын ажиллагааг өргөжүүлэх, залуу судлаач, докторантуудын судалгааны оролцоог дэмжих, Монголын судлаачдын олон улсын туршилт, эрдэм шинжилгээний хамтын ажиллагаанд оролцох боломжийг нэмэгдүүлэхэд ач холбогдолтой боллоо.