Профессор С.Одмаа “Өндөр температурын, хийн хөргөлттэй жижиг модульчлагдсан реактор ба тэдгээрийн аналитик хэрэгслийн дэвшилтүүд” сургалтад оролцлоо.

ИТС-ийн Ногоон эрчим хүч, инженерчлэлийн тэнхимийн профессор С.Одмаа 2025.11.03-07-ны өдрүүдэд ХБНГУ-ын Мьюнхен хотод Олон Улсын Атомын Энергийн Агентлагийн зохион байгуулсан “Өндөр температурын, хийн хөргөлттэй жижиг модульчлагдсан реактор ба тэдгээрийн аналитик хэрэгслийн дэвшилтүүд” сэдэвт бүс нутаг хоорондын сургалтад оролцлоо. 

Сургалт Мьюнхений Техникийн Их Сургуульд зохион байгуулагдсан ба Монгол, Малайз, Индонез, Сингапур, Хятад, Польш, Франц, Украйн, Алжир, Пакистан, Өмнөд Африкийн нийт 20 гаруй судлаач сонгогдон оролцжээ. Өндөр температурын хийн хөргөлттэй реактор (HTGR) 2 төрөл байдаг ба одоогоор призм блок төрлийнх нь Японд, үрлэн бөмбөг төрлийнх нь Хятад улсад амжилттай ажиллаж байна. Энэ төрлийн реактор TRISO гэх өвөрмөц цөмийн түлш ашигладаг тул тооцооллын кодууд түгээмэл биш. Энэ сургалтаар ОУАЭА-ийн ONCORE платформоос зөвхөн HTGR -ийн дизайны, ажиллагааны, ослын үеийн, термодинамикийн тооцооллыг хослон гүйцэтгэх кодын багцыг танилцуулж, лекц сонсон, дасгал ажиллалаа. 

Сургалтад оролцогчид мөн тус их сургуулийн судалгааны реактор FRM-II-той танилцжээ. Уг реактор нь өндөр баяжуулсан U3Si2-Al түлшээр ажилладаг байсан ба одоогоор бага баяжуулсан түлшээр солих, судалгааны зарим тоног төхөөрөмжийг шинэчлэх зорилгоор түр унтраасан байгаа юм байна. Судалгааны реакторыг хатуу биеийн физик, материал судлал, археологи палентлогийн олдвор судлал, биоинженерчлэл, хавдрын эмчилгээ, нейтрон радиограф, цацраг идэвхжлийн анализ зэрэг олон төрлийн судалгаанд нейтроны үүсгүүр болгон ашиглаж байна.