04/18, 2025
“ХОТЖИЛТ БА ХҮРЭЭЛЭН БУЙ ОРЧИН - 2024" ЗӨВЛӨЛДӨХ УУЛЗАЛТ БОЛЛОО.
2024/12/24 16:08
МУИС-ийн Инженер, Технологийн Сургуулиас жил бүр уламжлал болон зохион байгуулдаг “ХОТЖИЛТ БА ХҮРЭЭЛЭН БУЙ ОРЧИН - 2024” зөвлөлдөх уулзалт 2024 оны 12 дугаар сарын 12-ны өдөр МУИС-ийн Эрдмийн танхим (дугуй заал)-д боллоо.
Зөвлөлдөх уулзалтын зорилго нь шийдвэр гаргагч нарт тулгамдаж буй асуудлыг ойлгуулах, шинжлэх ухааны шинэлэг мэдлэг, арга зүйг танилцуулах, судалгааны үр дүнд боловсруулсан шийдлийн хувилбаруудыг шийдвэр гаргалтад ашиглахад дэмжлэг үзүүлэхэд оршино.
Энэ жилийн зөвлөлдөх уулзалтыг МУИС-ийн Инженер, Технологийн Сургууль, Шинжлэх ухааны сургууль Дэлхийн хөрсний өдрийг тохиолдуулан ШУА-ийн Газарзүй, геоэкологийн хүрээлэн болон Хөдөө Аж Ахуйн Их Сургууль, Байгаль орчин, уур амьсгалын өөрчлөлтийн яам, Нийслэлийн байгаль орчны газар хамтран зохион байгууллаа.
“Хотжилт ба хүрээлэн буй орчин - 2024” зөвлөлдөх уулзалтыг нээж МУИС-ийн Инженер, технологийн сургуулийн захирал Ч.Сономдагва, БОУАӨЯ-ны Хүрээлэн буй орчны бодлогын хэрэгжилтийн газрын Орчны бохирдлын хэлтсийн дарга Э.Урантогос, НБОГ-ын дарга Р.Энхтайван нар үг хэллээ.
Зөвлөлдөх уулзалтыг “Хотын газар ашиглалтаас үүдэлтэй хөрсний асуудал ба шийдэл”, “Хөрсөн бүрхэвчийн асуудал ба шийдэл”, “Хотын хөрсөн орчны асуудал ба шийдэл” гэсэн 3 сэдвийн хүрээнд 4 модератор чиглүүлэн явуулж, байгаль орчны салбарын байгууллага, их дээд сургуулийн төлөөлөл болох 7 зочин илтгэгч, судлаачид илтгэл хэлэлцүүллээ. Мөн нийт оролцогчдын дунд асуулт хариулт, санал хэлэлцүүлэг явуулж, бүх талууд асуудлыг тодорхойлж, шийдлийг дэвшүүлсэн амжилттай зөвлөлдөх уулзалт болж өндөрлөлөө.
